挩窗去弄險：大士爺厚火氣 (有聲書)

踏話頭 挩窗去弄險


2012年的熱天，彼時阮查某囝猶細漢，暗時電火關起來欲睏進前，若無講故事予過癮，是絕對袂放我煞的。

按呢逐工講逐工講，我烏白編亂亂說強欲無膏矣，囡仔硬愛我講落去，而且閣出難題：阮欲聽獅仔的故事啦！

嘛毋知欲講啥，我就講有一隻獅仔，廟門祀的彼款石獅仔，伊尻川癢，癢幾若十冬矣。

話頭遮爾仔趣味，查某囝精神就來矣，要求我共故事講透流。進前全無本，時到時擔當，紲落來我就講這隻石獅仔迒過神人的隔界，趁廟口無人，央一个囝仔兄來共爬癢，解決伊的舊症頭。（註1）
囡仔兄就是這本冊的主角：挩窗（Thuah-thang），佇彼个暗暝顯聖，行來我佮查某囝的地頭。毋管是食飯、睏進前、或者坐車無聊時，見若有要求，我就來講古，講挩窗佇人世和神明界飛天鑽地，走跳台灣南北二路，行踏世界各國，這个囡仔兄𤆬領阮規家伙仔挵入去奇幻的宇宙，可比拍電動解破一關閣一關，精彩刺激，鬧熱趣味。故事有長有短，有零星有規部的，抾拾整理好勢，用台文落筆，這就是「挩窗去弄險」系列。

Thuah-thang，四常的意思是人目睭仁對袂正，雞仔目，袂輸共人譬相；佇我的故事內底，「挩窗--ê」是一个勇敢掛智慧的小英雄；毋閣，若按日常的口語寫做台文，踮文學藝術的境界，「挩窗」的意義是：共心肝頭的窗仔門挩開，來去看這个美麗新世界。

2014年11月初，毋知是啥因端，雄雄想欲去騎虎王爺遐拜拜。踏踮廟埕，囡仔時來這搭圍仔補作文、食筒仔米糕的記持就瀳倚來矣。1984年騎虎王爺廟過翻起新廟，舊料保存落來，有影頂真，上寶貴的是柴雕的鰲魚，幼路閣活氣。較拍損的是，檢采為著保護驚去傷著，煞關佇咧鐵窗仔內。

我隨咒誓，定著來寫故事，共鰲魚救出來。（註2）

按怎救呢？自細漢蹛民雄街仔附近，規年迵天上重要的鬧熱，就是下街（Ē-ke）。彼是民雄囡仔最大的向望，我就共踅下街鬥鬧熱的歡喜和在地的歷史敆做伙，連紲三工佇飯桌仔全台語講古予查某囝聽，紲來用華語拍粗稿，先囥咧。

等我台文寫甲較扭掠矣，網路的發表平台嘛有新進展，就主動共SOS reader 提案，感謝團隊的牽成，2016年12月起鼓網路連載，一禮拜刊一集，攏總三十集，有台語文、相片影片、超連結解說佮錄音唸讀，這就是網路版的《大士爺厚火氣》。

這馬，交踮你手頭的，是紙印的《大士爺厚火氣》，多謝前衛出版社和主編鄭清鴻綿爛編輯，國藝會和火金姑台語文學基金補助，洪福田的版畫藝術，排版束結，朗讀錄音紲拍好聽，予這部出版計畫毋但完成，閣予台文冊一坎起去，實在是豐沛、媠氣、奅啦！

順聰我骨力拍拚創作《大士爺厚火氣》，是欲來建立「現代台文」敘述SOP，予台語飽滇的力頭盡展；而且用輕鬆活跳的小說，𤆬讀者來認捌台灣的神明鬼怪、歷史地理、傳說故事；上要緊的是，思考現代文明的困境佮未來。

故事全我編的，純屬虛構，若有雷同，彼攏是䢢拄䢢。內容對神明不敬的所在，請多多包涵，順聰我做的一切，攏是為著推捒台語，共咱的文化底蒂和宗教精神發揚光大。

當咧寫故事之時，九十幾歲的阿媽忽然間倒勼，轉去做一个囡仔，講話離離落落，頭殼沓沓仔失去……我看著真毋甘，就去握伊的手……經歷人生滄桑坎坷，阿媽的手面親像囡仔遐爾仔金滑幼秀……講著下街，阿媽煞記甲真清楚，講往過𤆬我去看大士爺伯化火的記持，宛然拄去過彼款……。

細漢時上愛轉去阿媽的田庄遐耍，佇古厝的眠床頂，聽阿媽講ももたろうさん（桃太郎）物語，我講古的才調是伊傳予我的。阿媽的台語講甲遐爾仔老（láu），我是一个冊讀甲真懸的智識分子，閣是攑筆的作家，怎會當輸予共我惜命命的阿媽呢！

「挩窗去弄險」系列故事，毋但講予我的查某囝聽，是欲予全台灣的囡仔聽，千千萬萬的囡仔聽，大人嘛愛斟酌聽─恁會當佇故事內底使囡仔性，佮「挩窗」仝款，四界行踏，認捌這个心適到有賰的美麗世界，啥物攏毋驚。



準備好矣未？和我同齊大聲喝出來：

我是勇敢掛智慧的小英雄，這場人生的大弄險，來起行！



註1：完整故事刊印佇《牧笛獎精品童話11：蒼蠅螞蟻讀心術》，鄭順聰〈屁股癢的石獅子〉彼篇，國語日報出版。

註2：我寫的是彼時的情形。後來，廟方共鐵窗仔換做新櫥仔，做甲真好勢，鰲魚這馬蹛佇咧真四序的所在呢。